:: Radio Drenasi ::

DËGJO RADIO LIVE

MARKETING

OPINJONI I JUAJ

RIKTHIMI I ADEM DEMAÇIT NË BANKËN E ZEZË!

Rikryqëzimi i Adem Demaçit në filmin dokumentar “Rikthimi i Kosovës” ka një emërues të përbashkët, interesin ekonomik dhe politik! Kush qëndron prapa rikryqëzimit të Adem Demaçit nuk është vështirë të qëllohet!

Në këtë film dokumentar të quajtur “Rikthimi i Kosovës”, Adem Demaçi ishte vënë në bankën e zezë, në bankën për të akuzuar por pa i dhënë rast që të mbrohej! U mohua se ishte Përfaqësues Politik i Zyrës së UÇK’së në Prishtinë dhe kjo u interpretua se ishte “zëri i UÇK’së” në Prishtinë! Askund nuk u përmend se ai energjikisht, në takim me Gelbartin dhe Holbrukun e kundërshtoi kualifikimin se UÇK’ë ishte organizatë terroriste por tha se UÇK’ë ishte ushtri çlirimtare! Antinomi i Adem Jasharit ishte në vijën e Gelbartit dhe Holbrukut sa i përket vlerësimit për UÇK-në!

Rikthimi i rikujtesës në vendin e krimit

Më 08.06.2009 në kinemanë “ABC” u shfaq premiera e dokumentarit të autores Alma Lama, “Rikthimi i Kosovës”. Mund të pyetni pse po shkruaj me aq vonesë për këtë çështje aq më parë që çdo gjë në Kosovë ka afat të shkurtër të përdorimit e shumë gjëra madje shiten dhe përdoren me afat të skaduar. Do ta sqaroj më vonë këtë. Ky film dokumentar ishte një laramani kronologjike e zhvillimit të ngjarjeve në Kosovë, duke filluar nga periudha e paraluftës, asaj të kohës së luftës e sidomos periudhës së pasluftës meqë thuaja të gjithë akte(o)rët flisnin nga perspektiva e ditëve të sotit ngase, “veprat“ e tyre shkëlqejnë më shumë! Ky film si edhe shumë ngjarje të tjera organizoheshin për nder të përvjetorit të hyrjes së forcave të KFOR-it në Kosovë në shenj falenderimi, përkushtimi, përkujtimi e çka jo tjetër! Shpeshhere këto manifestime e humbnin kuptimin e respektit duke u shndërruar në një vardisje të pashije, të patakt dhe të padinjitetshme! Me pak përjashtime! Në këtë film dokumentar u paraqitën, ndonëse në mënyrë fragmentare, megjithatë bindshëm tmerret e luftës të shkaktuara nga një regjim i çmendur e që paradoksi të jetë më i madh deri vonë gëzonte përkrahje të politikës ndërkombëtare, të faktorëve venndimmarrës! Pamjet flisnin vet, dëshmitë e të mbijetuarve gjithashtu! Civilët e vrarë, të ekzekutuar, të dhunuar e të masakruar nuk mund të flisnin! Në vend të tyre flisnin fotografitë, shifrat dhe të dhënat tjera! Luftëtarët e UÇK-së, që flijuan jetën e tyre për lirinë e Kosovës, të drejtën për vetvendosje dhe bashkim kombëtar, të drejtën për ta shkruar historinë e vërtetë e jo për një histori të imponuar dhe të shëmtuar siç është kjo e sotit, të drejtën për liri të fjalës dhe të shprehjes dhe të drejta të tjera kushtetuese, minus Ahtisarin që nuk na duhet gjë prej gjëje! Dëshmorët e rënë u bënë vet histori sepse e shkruan me gjakun e tyre! Edhe filmi dokumentar i Alma Lames “Rikthimi i Kosovës” do të duhej të bënte pjesë në këto të drejta për të cilat u flijuan dëshmorët e kombit, liria e fjalës pra, dhe shkrimi i historisë së vërtetë!

A e ka bërë këtë Alma Lama? Mendoj se jo!

Binomët dhe antinomët

Edhe në këtë film ndonëse jo në mënyrë të drejtpërdrejtë u trajtua fenomeni i binomit, këtij “margaritari” që sot në Kosovë përdoret ekskluzivisht për përfitime dhe mbijetesë politike. Ju ka rënë të dëgjoni, se në shumë paraqitje publike flitet për binomin Adem Jashari( ushtarak) dhe Ibrahim Rugova ( politikan) si një kombinim që ishte përcaktues për lirinë dhe pavarësinë e Kosovës! Merreni me mend, nëse mund të merret me mend! Rugova binom i Adem Jasharit! Në fakt, Rugova është antinom i Adem Jasharit, e kundërta e tij! Krejt çka ka qenë Adem Jashari, nuk ka qenë Rugova dhe Adem Jashari asnjëhere nuk ka mundur dhe nuk ka dashur të jetë si Rugova. Po të doje, nuk e ka pasur aspak vështirë të bëhej! Në fund të fundit, veprat flasin vet! Derisa Adem Jashari pushonte në Shtratin e Përjetësisë në kryeqytetin e Pavarësisë së Kosovës dhe Pijemontin e Shqiptarisë, në Prekaz, antinomi i tij organizonte “zgjedhje të lira dhe demokratike” në Kosovën e larë me gjak! Në mos për asgjë tjetër, ky është një fakt që e përjashton çdo bashkëdyzim apo binom të mundshëm midis tyre! Derisa Komandanti Legjendar në këtë film paraqitet ashtu si edhe ishte, biografia e antinomit të tij retushohej; bëheshin përpjekje që të paraqitej në një dimension joreal duke ia shlyer të gjitha gabimet dhe lëshimet që i kishte bërë! Kur të merren parasysh përpjekjet që po bëhen sot për legalizimin, zyrtarizimin e këtij “binomi” e që prapavijën dhe qëllimin e ka krejtësisht politik atëhere mund të kuptohet edhe kontributi i retushimit si domosdoshmëri për shkrimin e historisë së Kosovës që mësohet sot!

Dardanët, zhigolot dhe kurtizanet e politikës

Po t’i dëgjonit me kujdes deklaratat e disa të intervistuarve në këtë film dokumentar atëhere fare lehtë mund të fitohet përshtypja se historia e qëndresës së shqiptarëve ka filluar, ka vazhduar dhe ka përfunduar me ta! Atyre iu dha mundësia të flisnin çka të donin, të sulmonin kend të donin duke e liruar veten e tyre nga çdo përgjegjësi aq më parë që botërisht dihet se kontributi i tyre për lirinë e Kosovës ka qenë i barazvlefshëm me kontributin tim për dekonolizimin e fisit Zulu në Afrikë! Për dallim që edhe nëse nuk kam dhënë një kontribut të drejtpërdrejtë për pjesëtarët e fisit Zulu së paku nuk e kam dëmtuar procesin e dekolonizimit të tyre! Kështu nuk mund të thuhet për një numër të atyre, që filmin dokumentar “Rikthimi i Kosovës” e shfrytëzuan si purgator për pastrimin e së kaluarës së tyre të kriminalizuar meqë ishin pengues të luftës së UÇK-së dhe proceseve për konsolidimin e paqes në Kosovën e pasluftës! Një numër i protagonistëve në këtë film dokumentar, në vend se të ballafaqohen me gjyq, iu bëjnë gjyq të tjerëve! Edhe kjo është Kosovë!

Albin Kurti, sekretar i Zyrës së UÇK-së apo anëtar i Rrolling Stones-ve

Të gjithë ne që atëhere hynim dhe dilnim në një zyre (disa vullnetarisht, disa zyrtarisht e disa që i dërgonte Serbia) e që njihej si Zyra e Përfaqësuesit Politik të UÇK-së e që udhëhiqej nga Adem Demaçi e dinim se Albin Kurti ishte sekretar i zyrës së UÇK’së dhe Bacës Adem. Ky fakt retushohet në këtë film dokumentar si edhe roli jashtëzakonisht i madh i Albinit në atë kohë. Ky fakt është mohuar skajshmërisht para, gjatë dhe pas Konferencës së Rambujesë! Në mënyrë tmerrësisht të pandershme! Pasi është mohuar se në Prishtinë ka pasur zyre politike të UÇK-së me Përfaqësues politik, Adem Demaçin si dhe sekretar të kësaj zyre, Albin Kurtin jam interesuar se mos Albin Kurti ka qenë anëtar i Rrolling Stones-ve, së bashku me Mik Xhegerin dhe Kejt Riçardsin. As aty nuk figuronte emri i tij! Kujt t’i besoj tash, mbamendjes sime, zombizmit politiko - medial apo imagjinatës sime?!

Adem Demaçi dhe Pontie Pilatka

Pontie Pilati, pasi dha kontribut kapital për kryqëzimin e Krishtit, me një të larë duarsh deshi të lahej nga përgjegjësia! Fajin ua la të tjerëve, tregtarëve të Jerusalemit! Edhe Adem Demaçi u kryqëzua dhe u rikryqëzua shumë here. U kryqëzua vullnetarisht për lirinë e popullit të vet dhe të mirën e njerëzimit. U rikryqëzua nga dardanët, zhigolot dhe kurtizanet ( jo domosdoshmërisht dhe jo gjithhere të gjinisë femërore ) politike aq here sa ata kishin nevojë apo me urdhër të pardonëve të tyre! Në këtë film dokumentar të quajtur “Rikthimi i Kosovës”, Adem Demaçi ishte vënë në bankën e zezë, në bankën për të akuzuar por pa i dhënë rast që të mbrohej! U mohua se ishte Përfaqësues Politik i Zyrës së UÇK’së në Prishtinë dhe kjo u interpretua se ishte “zëri i UÇK’së” në Prishtinë! Askund nuk u përmend se ai energjikisht, në takim me Gelbartin dhe Holbrukun e kundërshtoi kualifikimin se UÇK’ë ishte organizatë terroriste por tha se UÇK’ë ishte ushtri çlirimtare! Antinomi i Adem Jasharit ishte në vijën e Gelbartit dhe Holbrukut sa i përket vlerësimit për UÇK-në! E sulmuan sidomos për shkak se e kundërshtonte “Marrëveshjen“ e Rambujesë dhe se e kundërshtonte autonominë për Kosovën që i pregatitej.. Nëse Pontie Pilati deshi të shfajësohej për përgjegjësinë për kryqëzimin e Krishtit duke i larë duart dhe duke thënë se tashmë është i pastër, Pontie Pilatka e Kosovës në filmin “Rikthimi i Kosovës” deshi të shfajësohej duke thënë se nuk ka mundur ta kontaktojë Adem Demaçin! Sikur të jetonim në shekullin e XV-të kur posta bartej me anë të pëllumbave! A ishte vërtetë mungesa e pëllumbave arsyeja e vënies në bankë të zezë e Adem Demaçit apo dëshira që t’u krijohet hapësirë mediale disa korbave të paqes dhe të luftës sa për t’i rehabilituar ata për hajnitë dhe krimet e tyre?! E mjerë është ajo shoqëri ku opinioni krijohet duke i mbyllë rrugë të vërtetës dhe ku i krijon hapësirë gënjeshtrës! Kryqëzimi i Krishtit në Jerusalem dhe rikryqëzimi i Adem Demaçit në filmin dokumentar “Rikthimi i Kosovës” kanë një emërues të përbashkët, interesi ekonomik dhe politik! Kush qëndron prapa kryqëzimit të Krishtit, nuk është vështirë të qëllohet! Kush qëndron prapa rikryqëzimit të Adem Demaçit gjithashtu nuk është vështirë të qëllohet!

Behxhet Sh Shala

· Autori i shkrimit është drejtor ekzekutiv i KMDLNJ’së. Qëndrimet janë personale.

E vendosur me datën: :

2009-07-02

shtypë këte tekst | dergo dikujt | 1028 u lexua |

Design

Hosted and Maintained by Imagjino.com