:: Radio Drenasi ::

DËGJO RADIO LIVE

MARKETING

OPINJONI I JUAJ

SY MË SY E BALLË PËR BALLË ME XHELATËT

E dashura Nënë,motër dhe vëllezër të dëshmorit të kombit prof. Xhemajli Berisha!
Të dashura familje të dëshmorëve të kombit!
Të nderuar invalid,veteran dhe ushtarë të ushtrive çlirimtare shqiptare!
Të nderuar veprimtarë të çështjes kombëtare!
I nderuar Kryetar i Komunës së Prizrenit prof. Dr. Ramadan Muja!
Të nderuar përfaqësues të institucioneve lokale dhe qendrore të Kosovës!
Të nderuar të pranishëm!
I dashur popull shqiptar!
Të nderuar teleshikues të Radio Televisionit të Kosovës!

Po ndjehem shumë i nderuar që në emër të Klubit Politik,që mban emrin e udhëheqësit të madh të Lëvizjes Popullore për Republikën e Kosovës, Heroit të Kombit”Afrim Zhitia”,të flas sot në Akademinë Përkujtimore me rastin e 20 vjetorit të rënies heroike,dhe 51vjetorit të lindjes së njërit prej burrave të mëdhenj të atdheut dhe popullit shqiptar, dëshmorit të kombit
prof. Xhemajli Berisha.

Motra dhe vëllezër!

Sot më 17 Prill 2009, mbushën 51 vjet që kur nëna e heroinë Mihrije Berisha solli në jetë Xhemajliun e vogël,i cili me vetëm 31 vite jetë, i pajisur me dije e kulturë të gjerë shkencore, atdhetare,politike e kombëtare,i angazhuar në Lëvizjen politike ilegale atdhetare më përparimtare të kohës,në Lëvizjen Popullore për Republikën e Kosovës, do të binte në sytë e kolosëve të veprimit e të mendimt politik ilegal kombëtar dhe do të admirohej figura e Tij nga Ata,por edhe do të bëhej tmerr për pushtuesin serb dhe veglat e tyre jo vetëm në Prizeren por në tërë Kosovën dhe viset e saj.
Jo vetëm burrave të mëdhenj dhe emrave të shquar të kombit tonë,por atyre të tërë universit u ndodhin lindja dhe rënia në të njëjtin muaj ose edhe në të njëjtën ditë. Ka shumë koinçidenca të tilla në historinë e lavdishme kombëtare dhe njerëzore.
Të tillë e kemi dëshmorin e kombit,prof. Xhemajli Berishën që po e përkujtojmë dhe nderojmë sot.
Po kujt i ka shkuar mendja se pas 31 vitesh po në muajin Prill, Xhemajli Berisha do të përfundonte jetën e tij në rrethana dramatike?!
E jashtëzakonshme.
Në rrugën e lavdishme të luftës për liri të popullit shqiptar prof. Xhemajli Berisha, përjetoi vdekjen më madhështore dhe më të tmerrshme njëkohësisht.
Madhështore se me vetëdije të plotë shkon në olimp të Panteonit kombëtar,renditet përkrah burrave më të shquar të kombit,të tmerrshme sepse në qelitë famëkëqija të UDB-së, torturohet dhe vritet barbarisht.
Të gjithë të rënët për liri e kanë vendin e rënies dhe betejën ku kanë zhvilluar luftën?
Po prof. Xhemajli Berisha të cilit ne sot i përulemi me respektin më të madh, ku ka rënë vallë?
Për atdhetarët e mëdhenj e të flaktë, rënia heroike në istikamin e luftës për liri me pushkë në dorë,ishte vetëflijim suprem i çlirimtarit të armatosur,që e donte me çdo kusht çlirimin dhe pavarësinë e atdheut!
Po rënia heroike, sy më sy e ballë për ballë në luftë absolutisht të pabarabartë me armikun,pa pushkë e pa bomba në duar,çfarë është?
A është tejkalim edhe i rënieve me armë në duar në luftë frontale me pushtuesin?
A ka rënie më madhështore se sa t’i trondisësh mëndjet dhe imagjinaten kriminale të udbashëve titist,të mos u tregosh asgjë nga ajo që ke vepruar në rrugën tënde ilegale patriotike të luftës për liri?
Cila ka qenë gjendja shpirtërore dhe morale e udbashëve të zinj serb e shqiptarë,që përballë vendosmërisë së profesorit të hekurt,që nuk pranonte të jepte asnjë shok,që nuk dekonspironte asnjë ngjarje,që kishte qëndrim të prerë:të ruante në mendje dhe zemër gjithçka që kishte vepruar dhe krijuar në të mirë të luftës ilegale për lirinë e popullit dhe atdheut të Tij,dhe asgjë nga ajo ecje e mundimshme por e lavdishme të mos mësonte rregjimi i pushtuesit dhe veglat e tyre të ndyra.
Prof.Xhemajli Berisha, shqiptari me zemër të madhe,i lidhur këmbë e duar me pranga e zingjirë,i torturuar për vdekje, në burgun e qytetit të Lidhjes Shqiptare të Prizrenit,jetoi qaste tronditëse të jetës së Tij.
Dëshmori i kombit prof. Xhemajli Berisha,derdhi gjakun themeleve të kullës së Lidhjes së lavdishme shqiptare dhe kalldrëmit ku kishin hedhur hapin e tyre historik figurat e ndritura të kombit,patriotët e mëdhenj si Abdyl Frashëri,Sylejman Vokshi,Mic Sokoli etj.
Për netë dhe ditë të tëra,Prizreni që kishte dëgjuar thirrjen historike kombëtare të tribunit të kombit Ramiz Cerrnica në Kuvendin famëkeq të vitit 1945”JO ME SERBINË, POR ME SHQIPËRINË”,ishte dëshmitari i madh që po përjetonte ngjarjen makabre të përfundimit tragjik të jetës së profofesorit që qëndronte i pathyeshëm në gestapon serbe, si çelik.
Pa dyshim se është rënia më madhështore dhe heroizmi më i madh i mundshëm.
Prof. Xhemajliun e kanë hedhur të gjallë nga ndërtesa e burgut famëkeq apo të mbytur nga torturat çnjerëzore?
Nëse luftëtari kombëtarë është hedhur i gjallë nga ndërtesa famëkeqe e burgut apo e UDB-së,çfarë ka mundur të mendojë kur e ka parë formën e ekzekutimit?
Po nëse është hedhur nga ndertesa i mbytur pas torturave çnjerëzore,sa kriminel ta kenë shtyrë vallë për ta përplasur për tokën nënë?

Cilado që të jetë e vërteta,të gjithë mund ta imagjinojmë se sa të madhe duhet ta kesh zemrën, kur armiqve dhe tradhtarëve nuk u mbetet rrugë tjetër,pos asaj të të ekzekutojnë në mënyrën më barbare,ashtu siç ia bënë dëshmorit të kombit prof.Xhemajli Berishës.
Pushtuesit serb si kriminel të pashembullt që ishin, tentuan ta fshehnin krimin monstruoz që e kishin bërë,duke ia ofruar Ortoped traumatologut të njohur Prizrenas Dr.Halil Berishës një dokument për ta nënshkruar se gjoja prof.Xhemajliu kishte kërcyer nga dritarja e burgut dhe ishte vetëvrarë,por doktori patriot kur e kishte parë se kriminelët e kishin bërë copë-copë e kishin shqyer trupin e Xhemajliut të pamposhtur,duke ecur gjurmëve të paraardhësit të tij të famshëm atdhetarit Dr.Ali Sokoli,që nuk kishte pranuar të nënshkruante mbytjen në tortura të Fazli Graiqevcit,refuzon në mënyrë kategorike nënshkrimin, por kriminelët serb më 2 Qershor 1989 i hakmerren, 1 muaj e gjysmë pas vrasjes në torturë të prof.Xhemajli Berishës, e helmojnë doktorin patriot Halil Berisha.

Motra dhe vëllezër!

Historia e qëndresës heroike nëpër burgjet dhe kazamatet jugogosllave të bijëve të mëdhenj të popullit tonë,është e njohur për të gjithë,por janë të paktë ata që hynë në burgje dhe nuk dolën të gjallë nga to.
Fazli Grajçevci nga Drenica,Shaban Shala nga Llapi, Afrim Abazi nga Ferizaj,Xhemajl Blakaj nga Istogu,Zija Shemsiu nga Gjilani,Xhemajli Berisha nga Prizereni,Arif Seferi nga Kumanova,Besnik Restelica nga Pudujeva janë të burgosurit politik shqiptar,të cilët janë mbytur në tortura çnjerëzore.
Është i njohur fakti se luftës së armatosur çlirimtare të popullit shqiptar në Kosovë,Maqedoni dhe Kosovë Lindore,i ka paraprirë një epokë e tërë e përpjekjeve dhe ngjarjeve të lavdishme kombëtare.
Në atë epokë që është shkruar në historinë e popullit shqiptar me shkronja ari,roli dhe kontributi i prof. Xhemajli Berishës,ishte i rreshtave të parë.
Lëvizja politike ilegale në Kosovë e vise,me rënien e dëshmorit të kombit prof. Xhemajli Berisha,morri një goditje të rëndë,sepse humbi përgjithmonë një nga anëtarët dhe drejtuesit e saj,i cili me vlerat e larta që përfaqësonte,paralajmëronte një udhëheqës të përmasave të mëdha kombëtare.
Viti 1989 ishte viti i ngjarjeve të mëdha për Kosovën dhe popullin shqiptar.
Shokët dhe bashkëveprimtarët e dëshmorit të kombit prof. Xhemajli Berisha,me gjithë humbjen që përjetuan me rënien e Xhemajliut,luftën për liri nuk e ndalën,por përkundrazi i dhanë hov edhe më të madh.
Rënia për liri dhe gjaku i derdhur nga dëshmori i kombit Xhemajli Berisha, u pasua në të njëjtin vit me 2 Nëntorë 1989,nga Udhëheqësi i Lëvizjes politike ilegale Afrim Zhitia,dhe shoku e bashkëluftëtari i tij Fahri Fazliu.
Llapjanët legjendarë të popullit shqiptar në kryeqytetin e Kosovës në Prishtinë,duke mos u dorëzuar filluan një luftë shumë të pabarabartë me ata armiq të cilët para 7 muajve kishin mbytur në tortura çnjerëzore shokun e bashkëluftëtarin e tyre në burgun e Prizerenit dëshmorin e kombit prof. Xhemajli Berisha.
Pas rënies së Xhemajliut,Afrimit dhe Fahriut,dhe pas largimit për shërim të Fadil Vatës,ilegalët e Kosovës u dobësuan shumë,por luftën dhe përpjekjet për liri e pavarësi nuk i ndalën nuk i ndalën.
Duke e parë se pushtuesi po i mbytëte e vriste të gjithë ata që guxonin t’i kundërviheshin, u themelua e lavdishmja Ushtria Çlirimtare e Kosovës,e cila me luftën e saj të armatosur çlirimtare,bëri realitet shumë nga ëndrra e madhe e të rënëve për liri jo vetëm të vitit 1989.
Ushtria Çlirimtare e Kosovës e morri hakun dhe gjakun e qindra dhe mijëra shqiptarëve të vrarë e të masakruar para, gjatë dhe pas Luftës Dytë Botërore,por në mënyrë të veçantë atë të dëshmorit të kombit prof. Xhemajli Berishës që po e nderojmë sot, por edhe të Fazli Grajçevcit,të Shaban Shalës,Afrim Abazit, Jusuf Gërvallës,Kadri Zekës, Bardhosh Gërvallës,Rexhep Malës, Nuhi Berishës, Bajram Bahtirit,Zija Shemsiut,Ali Ajetit,Bedri Sokolit, Afrim Zhitisë, Fahri Fazliut,Arif Seferit,Besnik Restelicës,Hasan Ramadanit,Dëshmorët e Zhurit, e të shumë të rënëve të tjerë,por edhe të doktorëve legjendar Ali Sokoli dhe Halil Berisha.

Motra dhe vëllezër!

Dëshmorët e këtillë si prof.Xhemalji Berisha që po e përkujtojmë dhe nderojmë sot,që do të nderohet për jetë e motë nga breza të tërë që do të vijnë,njerëzimi i ka të pakët,ndërsa populli ynë i numëron në gishta.
Prandaj do të pyesja vallë,a është e mjaftueshme që vetëm shtëpia e Kulturës në Prizeren ta mbajë emrin e këtij vigani që edhe burgun serb e ka bërë të pavlerë,pa folur për udbashët që ua ka shpartalluar të gjitha teoritë dhe praktikat e ndëshkimit shpirtërorë dhe fizik të të burgosurit politik shqiptar?

Prandaj me këtë rast do t’i drejtohesha të parit të qytetit të Prizrenit.
Shumë i nderuar Kryetar i Komunës së Prizrenit prof. Dr. Ramadan Muja,kam nderin e madh të ju ftoj publikisht që duke shfrytëzuar kompetencat Tuaja ligjore,që ish- shkollën “Dimitrije Tucoviq” në ambientet e të cilës u arrestua para syve të nxënësve të Tij, sot “Ymer Prizereni” ku ka dhënë mësim për vite të tëra Dëshmori i Kombit, t’ia vëni emrin prof.Xhemjali Berish.
Dhe jo vetëm kaq, i nderuar Kryetar prof. Dr.Ramadan Muja,në flamurin e gjatë me kilometra të tërë që e bartët në Prizren me rastin e shpalljes së Pavarësisë së Kosovës,që ishte një gjest shumë madhështor dhe do të mbete gjatë në memorien e kombit si një ngjarje e rrallë, aty në ballë të ballit të flamurit kombëtar,qëndron emri i artë i prof.Xhemajliut,andaj ju propozoj gjithashtu që trupin e Dëshmorit të Kombit prof. Xhemajli Berisha, ta dergoni me ceremoni madhështore nderimi e respekti,atje ku prehet nderi i kombit,pra te varrezat e Dëshmorëve të Kombit.

Të nderuar të pranishëm!

Nuk do të ndjehem i qetë nëse Kryetarit të Komunës së Prizrenit,nuk do t’i kërkoja edhe nji emërtim që do të na bënte nderë në tërë Kosovën e veçanërisht qytetit të Prizrenit.

I nderuar Kryetar prof. Dr. Ramadan Muja,Dr.Ali Sokoli që ka kundërshtuar ta nënshkruaj aktin e vetëvrasjes së patriotit të madh nga Drenica Dëshmorin e Kombit Fazli Grajçevci,populli dhe Qeveria e kanë përjetësuar duke i dhënë shkollës së Mjeksësisë në Prishtinë emrin e Tij,ndërkaq Dr.Halil Berisha që ka kundërshtuar nënshkrimin e vetëvrasjës së Dëshmorit të Kombit prof.Xhemajli Berisha,dhe pas nji muaji e gjysmë është helmuar nga kriminelët serb, nuk i është bërë deri sot edhe pas 20 viteve asnji nderim publik,unë sot ju propozoj që Shkolla e Mjeksisë në Prizren,që mban emrin “Luqiano Matroni” ku ka dhënë mësim doktori i pavdekshm, të merrni vendim dhe ta emroni me emrin “Dr.Halil Berisha”.
Duke nderuar të rënët dhe gjakun e derdhur për liri,dëshmojmë se meritojmë të ecim vertikalisht dhe me nderë përkrah popujve të lashtë e me kulturë të tërë botës.
Lavdi Dëshmorit të Kombit prof. Xhemajli Berisha!
Lavdi Dëshmorëve të Kombit!

Ismet Sylejmani
Kryetar
____________
i Klubit Politik
“Afrim Zhitia”
17.04.2009,Prishtinë

E vendosur me datën: :

2009-04-18

shtypë këte tekst | dergo dikujt | 1295 u lexua |

Design

Hosted and Maintained by Imagjino.com