:: Radio Drenasi ::

DËGJO RADIO LIVE

MARKETING

OPINJONI I JUAJ

DËSHMORI RESHAT YMERI,DEMONSTRUES I RADHËVE TË PARA

autor:Ismet Sylejmani

Shumë e dashur Nënë, të dashur vëllezër dhe familje e gjerë e dëshmorit të kombit Reshat Ymeri!
Të dashur pjestarë të familjeve të dëshmorëve të kombit!
Të dashur invalid,veteranë dhe luftëtarë të Ushtrisë Çlirimtare të Kosovës,të UÇPMB-së dhe Ushtrisë Çlirimtare Kombëtare!
Të nderuar ushtarë dhe oficerë të FSK-së!
I nderuar ish-Komandant i ZOD-it Ramush Haradina,i nderuar ish-Komandant i ZOK-ut Ahmet Isufi!
Të nderuar përfaqësues të institucioneve qendrore dhe lokale të Republikës së Kosovës!
Të nderuar të pranishëm!
Zonja dhe Zotrinjë!
Kanë kaluar plotë 19 vite që na ndajnë nga 29 Janari i vitit 1990,nga ky muaj i lavdishëm dhe tragjik për popullin shqiptar e për lëvizjen tonë politike ilegale kombëtare.
Nëntëmbëdhjetë vite nga dita kur u qëllua për vdekje nga policia serbe, demonstruesi shqiptar,qytetari i Gjilanit,dëshmori i kombit Reshat Ymeri,gjaku i të cilit,ashtu si edhe gjaku i të rënëve të tjerë, ka ujitur rrugët e Gjilanit,në atë rrugë ku qindra dhe mijëra njerëz në ditë shkelin të lirë dhe të pa frikë,se do të mund t’i kap plumbi i pushtuesit.

JANARI MUAJ I LAVDISHËM POR EDHE TRAGJIK PËR GJILANIN

O zot,si ishte e mundur derdhej gjaku për liri nga Gjilani,dhe përsëri në Janar.
Në Janar Kadriu,në Janar Rexhepi,në Janar Nuhiu,në Janar Reshat Ymeri dhe në Janar më 1993 aksidentalisht,do të vdiste udhëheqësi i demonstratave të vitit 1989-1990, dëshmori i heshtur i kombit tonë, Xhevat Qerimi.
Ky muaj po shndërrohej në burim frymëzimi për luftëtarët kombëtar,por edhe po bëhej më i pangopuri,sepse na i morri me plot lavdi bijtë më të mirë,luftëtarët më të mëdhenj,udhëheqësit,organizatorët dhe demonstruesit më të shquar,më aktiv dhe të radhëve të para.
Qendresa dhe rënia heroike e udhëheqësit të LPRK-së, heroit të kombit Afrim Zhitia dhe shokut e bashkëveprimtarit të tij,heroit Fahri Fazliu,janë vula me gjak e ngjarjeve të vitit 1989.Vitet 1989 dhe 1990,do të mbahen gjatë në mend në kujtesen e popullit tonë,kurse historia do të dëshmojë,se në këto vite në Gjilanin heroik të Rexhep Elmazit, të Kadri Zekës,Rexhep Malajt e Nuhi Berishës,Zija Shemsiut,Reshat Ymerit dhe Agim Rashitit, populli shqiptar,i udhëhequr nga bijtë dhe bijat e tij më të mirë, kishte mbushur rrugët dhe sheshet,dhe ashtu sikur në vitet 1968 dhe 1981, kërkonte të drejta e barazi,liri e Republikë për popullin shqiptar nën ish-Jugosllavi.
Pjesmarrja masive e popullit shqiptar në demonstratë,ishte tregues i qartë për Serbinë pushtuese,se në Kosovë po krijoheshin rrethana të tjera dhe të reja. Ishte tregues i qartë se në udhëheqje kishte ardhur nji gjeneratë e re,vazhduese besnike e idealeve të mëdha e liridashëse të heronjve Kadri Zeka,Rexhep Mala,Nuhi Berisha,Zija Shemsiu dhe të shokëve të tyre të gjallë që ishin burgosur dhe po dergjeshin burgjeve nëpër ish-Jugosllavi.

LPRK ORGANIZATORE DHE DREJTUESE E DEMONSTRATËS

Natën e 19 Janarit Këshilli i Rrethit të LPRK-së për Gjilan,Viti dhe Kamenicë(Kryetar i të cilit ishte dëshmori i kombit,drejtuesi i madh e i lavdishëm Xhevat Qerimi,që u përkujtua para disa ditësh këtu në këtë sallë),janë shpërndarë TRAKTE të LPRK-së që ishin derguar nga udhëheqja qendrore për shpërndarje, TRAKT që i drejtohej popullit shqiptarë dhe opinionit të jashtëm,me rastin e mbajtjes së Kongresit të 14 të Jashtëzakonshëm të LKJ-së.
Ky dokument politik ilegal kombëtar, ishte materiali që iu gjet në xhep, pas vrasjes nga policia pushtuese serbe dëshmorit të kombit Reshat Ymeri,të cilin nga vendi i vrasjes e dërguan deri tek ambulanca afër stadiumit, vëllezërit Zeqir e Ali Rrahmani,dhe Nexharije Bajrami,dhe prej ambulancës e morri ndihma e shpejtë me shofer Riza Nezirin,i cili me gjithë pengesat e mëdha policore, bëri gjithçka që ishte e mundur për ta derguar sa më shpejtë në spitalin e Prishtinës,por pa sukses- demonstruesi shqiptar Reshat Ymeri, nuk kishte mundur të përballonte plagët e marra nga plumbat e pushkëve të pushtuesit..
Jeta nga afër në nji lagje me Ahmet Isufin,Komandantin e ardhshëm të Zonës Operative të Karadakut të UÇK-së e me familjen e Tij,kthimi nga Zvicrra ku kishte kontaktuar me shumë veprimtarë kombëtar dhe fryma atdhetare që dominonte në gurbet për atdheun e robëruar, mbajtja në gji e TRAKT-it të LPRK-së nga Reshat Ymeri,në kohën kur po demonstrohej në të gjitha anët e qytetit,e veçanërisht në Dardani(ish-Gavrani),është dëshmi se sa të vetëdijshëm e morri plumbi i armikut këtë djalë të ri,që ishte plot vrull rinor,që i ishte përgjigjur thirrjes për të dalur në demonstratë,e për të kundërshtuar rregjimin ushtarako-policor të pushtuesit dhe shërbëtorëve të tyre.
Gjilani i 29 Janarit të vitit 1990,ishte një nga qytetet e shumta të Kosovës që jehonte fuqishëm me thirrjet duam liri,të drejta e Republikë për Kosovën. Këto kërkesa legjitime dhe demokratike që kërkoheshin nga populli shqiptar,në vend të përgjigjes së drejtë,ato binin në vesh të shurdhër,ndërsa ata që këto i kërkonin në rrugë të drejtat e popullit,shtypeshin dhe vriteshin,kundër tyre hidhej gazë lotsjellës,goditeshin me shkopinj dhe vriteshin ata që sulmonin më së shumti policinë dhe veglat e tyre.
Në frontin e luftës për liri të popullit shqiptar, me forcat e errëta të Serbisë dhe veglat e saj në Kosovë,e mori plumbi i armikut, afër postës së vogël në Dardani(ish-Gavrani),demonstruesin e radhëve të para, dëshmorin e kombit Reshat Ymerin.

VENDOSËM TË VEPRONIM JO VETËM ME DEMONSTARTA

Vrasja e Reshat Ymerit,ishte goditje e rëndë.Ishte krijuar një atmosferë e zymtë në Gjilan,mbi supet tona si organizatorë të demonstratës u shtua edhe më shumë përgjegjësia,gjakun që e derdhi Reshati në rrugët e Gjilanit,plagosjet dhe rrahjet që na ishin bërë, na obligonin ta vazhdonim luftën edhe më me forcë,dhe filluam të mendonim se luftën duhet ta vazhdonim dhe ta kombinonim edhe me forma të tjera,sepse shihej që nuk shkonte më ashtu,ne me gurë, e ata me rrahje,gazlotsjellës,armë e vrasje.
Dhembja jonë për rënien e dëshmorit Reshat Ymeri,ishte padyshim shumë e madhe. Reshati që i shtohej gjerdanit të artë të të rënieve për atdhe dhe rënditja përkrah heronjve e dëshmorëve të kombit,Kadri Zeka,Rexhep Mala e Nuhi Berisha,Zija Shemsiu,Rexhep Elmazi e Agim Rashiti ishte e jashtëzakonshme.
Që nga rënia e demonstruesit, deshmorit të kombit Reshat Ymeri,në demonstratat e janarit 1990, që ishte e fundit para fillimit të luftës së armatosur të UÇK-së,në komunën tonë kanë rënë në luftë për liri edhe shumë dëshmorë,emra të mëdhenj e të njohur si Avdullah Tahiri,Agim Ramadani,Pajazit Ahmeti,Alban Ajeti,Tefik e Hanumshahe Zymberi,Rrahim Beqiri,Skyfter Arifi,Shefik Miftari e shumë të tjerë.

EDHE DHJETË VJET PAS ÇLIRIMIT, NUK JANË NË VARREZA TË DËSHMORËVE TË KOMBIT
Luftëtarët dhe komandantët nga Komuna e Gjilanit, të rënë në luftën e Ushtrisë Çlirimtare të Kosovës,të UÇPMB-së dhe Ushtrisë Çlirimtare Kombëtare,tani dëshmorë të kombit, pas përfundimt të luftërave janë varrosur në varrezat e dëshmorëve të kombit,në Kodrën e Dëshmorëve në Gjilan. Pas tyre në varrezat e dëshmorëve janë rivarrosur heronjtë e mëdhenj të kombit,Kadri Zeka,Rexhep Malaj dhe Nuhi Berisha. Por në këto varreza çuditërisht edhe pas 10 viteve të çlirimit të Kosovës,nuk pushojnë eshtrat e dëshmorit të kombit,Reshat Ymeri që po e nderojmë sot,pastaj dëshmorët Rexhep Elmazi, Zija Shemsiu dhe Agim Rashiti.
Dhe sot Kryetarit të Komunës së Gjilanit z.Qemajl Mustafa,i propozoj dhe i bëj thirrje,që me rastin e përvjetorit të radhës që do vijë, të çlirimit të qytetit të Gjilanit nga pushtuesit serb,të organizojë rivarrimin me nji ceremoni madhështore të këtyre dëshmorëve,të mbetur padrejtësisht në varrezat e njerëzve të rëndomtë të popullit tonë,dhe përfundimisht në Kodrën e Dëshmorëve, të bëhen bashkë të gjithë të rënët për lirinë e Kosovës.

DËSHMORËT E RËNË PARA LUFTËS SË UÇK-SË,NUK JANË DE JURE DËSHMORË TË KOMBIT

Ia rikujtoj Kryetarit të Komunës së Gjilanit dhe të gjithë faktorëve relevant në Gjilan dhe më gjerë,se heronjve dhe dëshmorëve të kombit nga Gjilani,Kadri Zeka,Rexhep Malaj,Nuhi Berisha,Zija Shemsiu,Rexhep Elmazi,Agim Rashiti,Reshat Ymeri, por edhe atyre nga anë të ndryshme nga Kosova si Jusuf e Bardhosh Gërvalla,Afrim Zhitia e Fahri Fazliu,edhe pas çlirimit të Kosovës,vazhdon të mos u njihet edhe de jure,statusi heronjë e dëshmorë të kombit.
Të kërkohet nga Kuvendi i Kosovës,që urgjentisht këtyre burrave të mëdhenj të kombit,gjaku i të cilëve ka ujitur tokën tonë,t’u njihet ky status dhe familjet e tyre të gëzojnë të drejtat dhe nderet që u takojnë.
Lavdi e përjetshme dëshmorit të kombit Reshat Ymeri!
Lavdi dëshmorëve të kombit!

29 Janar 2009,Prishtinë

Ismet Sylejmani

Kryetar i Klubit Politik”Afrim Zhitia”

E vendosur me datën: :

2009-04-04

shtypë këte tekst | dergo dikujt | 1136 u lexua |

Design

Hosted and Maintained by Imagjino.com